कविता

*आज के तुलसी दास*

बरसत पानी कड़कत बिजली,

आधा     रात   चउमास के।

रत्नावली   ह   देखिच,

चाल ल तुलसी दास के।।(1)

हे पति  हे स्वामी,

तोर मया ह का काम के।

ए नरक ले तर जाबे, 

नाम लेबे त श्री राम के।।(2) 

तुलसी के बुखार उतरगे,

रत्ना के सुन के बोली।

उमर भर के बीमारी ले,

तुलसी ह पागे राम के गोली।(3)

राम ल पाए बर रत्ना ह,

बनगे तुलसी के गुरु।

घर ले बाहिर निकल के,

रामायण लिखे  करिच शुरू।(4)

आज के रत्ना ह

समझाथे तुलसी दास ल।

धरती म बईठ के

अमरथे अकास ल।।(5)

रत्ना ह ठंडा होथे,

तुलसी ह गरम होथे।

रत्ना बर तुलसी के मन म

बड़ भरम होथे।।(6)

रत्ना ह थाना म

करथे शिकायत पेस।

तुलसी दास बर

लग जाथे दहेज के केस।(7)

रत्ना तुलसी दुनो झन

जमाथे अब्बड़ धाक।

आखिर म एक दूसर के,

हो जाथे तलाक।।(8)

नारी के आरक्षण ल

झन समझबे खेल।

ओ तुलसी ह राम ल पागे

तोला भेजत हाँवव जेल।।(09)

जेल घर के आगी म,

चाउर दार सही चुरबे।

ओ समय के तुलसी म

अरे पगला तैहा कहाँ पुरबे।।(10)

       *ज्वाला प्रसाद कश्यप*

        *भठली कला(मुंगेली)*

          *8770734890*